Па краіне роднай мовы!
19.01.2018Вы паслухайце, мова якая!
Нiбы рэчачка, цiха журчыць,
Нiбы скрыпка, цудоўна спявае,
Трэба толькi на ёй гаварыць.
Лідзія Полазава
Менавіта роднай мове было прысвечана пазакласнае мерапрыемства ў ДУА “Дзіцячы сад-пачатковая школа п. Садовы” Пінскага раёна. Настаўнік пачатковых класаў Гуд Юлія Аляксандраўна запрасіла вучняў да ўдзелу ў інтэлектуальным турніры “Па краіне роднай мовы”. Дадзенае мерапрыемства было накіравана на развіццё цікавасці да беларускай мовы, фарміраванне матывацыі да вывучэння роднай мовы, жадання “на ёй гаварыць”.
Мерапрыемсва адбывалася ў форме інтэлектуальнага спаборніцтва, пераможцаў якога вызначала строгае журы. У турніры прымалі ўдзел дзве каманды пад назвамі “Слова” і “Сказ”, свае назвы яны атрымалі выканаўшы першае заданне “Зашыфраванае слова”. Вучні разгадвалі таямніцы роднай мовы, выконваючы заданне “Знайдзі прадмет”, у ходзе якога было неабходна злучыць слова (патэльня, каўнер і інш.) з выявай прадмета. І гэта аказалася не зусім лёгка!
З задавальненнем дзеці ўпрыгожвалі елку словамі-назоўнікамі. Кемлівасць і ўвага спатрэбіліся вучням, каб раздзяліць моўны ланцужок на часткі-словы. У конкурсе “Перакладчыкі” каманды прапанавалі сваім праціўнікам перакласці падрыхтаванныя загаддзя словы з рускай мовы на беларускую.
Гледачам таксама не прыйшлося сумаваць, яны актыўна прымалі ўдзел ў гульні “Скажы наадварот”. Паміж конкурсамі былі арганізаваны хвілінкі паэзіі, калі малодшыя школьнікі дэкларавалі вершы беларускіх аўтараў.
На працягу ўсяго спаборніцтва трымалася напружаная інтрыга, але ж добрыя веды беларускай мовы, ўважлівасць і кемлівацсь дапамаглі камандзе “Слова” атрымаць перамогу.
Нягледзячы на вынік, усе ўдзельнікі атрымалі бадзёры настрой, задавальненне ад гульні і яшчэ раз упэўніліся, што родная мова самая прыгожая і мілагучная.
Намеснік дыректара
па асноўнай дзейнасці
Ярашэвіч В.В.